鄭嘉穎落order打杏兒屁股

去年鄭嘉穎憑劇集《怒火街頭》「Law霸」成為雙料視帝，帶挈他在內地成為吸金王，為望冧莊Keep人氣，下周一播出的續集可謂不容有失。今輯他加足料，首星期便與胡杏兒激咀連場，又自度劇情加插打杏兒屁股戲份，更赤膊上陣騷肌，一於以激情及重口味戲份吸睛。

咀到熟有默契

嘉穎透露打杏兒屁股是他想出來：「咁賤格嘅嘢係我度，佢做咗我女朋友，我係Law霸，街坊就叫佢Law友，所以度呢場戲笑下囉！」他直言對第二輯充滿期望，但未知撞正奧運會否影響收視。

提到咀戲不斷，杏兒及嘉穎異口同聲表示因第二集已是情侶關係，故非常合理。杏兒說：「拍第一集嗰陣有啲驚，依家熟咗好有默契，仲有小別勝新婚嘅感覺，今次咀到熟晒。（過電？）當佢係兄弟！」

唔怕男友呷醋

問到會否怕男友黃宗澤呷醋？杏兒說：「冇呀！拍戲啫！反而驚嘉穎fans呷醋，佢咁紅。（同嘉穎組情侶檔？）對今次好有信心，但我想做百搭情侶喎！」她透露劇中兩人的感情線出現新火花，因加入了苟芸慧飾演的第三者，其中一場戲苟姑娘更激動得發生意外翻車。

文：影視組